كلكيعة : راجل و ست

بدون مقدمات

العلاقة شبه مقطوعة من يوم ما انا و عيت على الدنيا .. ماعرفش مقطوعة من قبل كدة بكام ميت سنة كمان .. للأمانة العلاقة مش مقطوعة تماماً .. لسة فيه تواصل جسدي (سريري) في أوساط المتجوزين و بعض أوساط اللي زهقوا من الانتظار اليائس لمعجزة تساعدهم على الجواز.

معروف طبعاً أنك عشان تتجوز لازم تكون صاحب رأس مال تدفعه لأبو العروسة نظير أنه حافظلك على عذريتها لحد ما انت شرفت و الله أعلم نجح في الحفاظ عليها ولا لأ، بالرغم من الفلوس اللي بتتدفع دي حتسمع برضه كلام من عينة ان الراجل مش بيحترم عقل المرأة و إن الراجل كائن شهواني وسخ مش بيفكر غير في بتاعه و بس.

لو نجحت في الجواز أبو تسعيرة مرنة جداً حسب إمكانيات أسرة العروسة فـ ألف مبروك .. انت نجحت في شراء إنسانة تغسلك و تربي عيالك و تطبخلك و تتفرج معاك على تمثيلية الساعة 7 و تنام معاك كمان في مقابل إنها حتطلع دين أمك غباء لآخر عمرك .. ما تحاولش تقنعني أنك ممكن تشتري كائن بيفكر.

لو ما اشترتلكش واحدة فـ انت شخص من اتنين : معاكش فلوس أو صاحب مبدأ (لأ يا كلاب أنا مش حتجوز كدة) ، لو معاكش فلوس .. معلش بقى استنى لما يبقى معاك ، و لو صاحب مبدأ.. عنك ما اتجوزت .. الرجالة اكتر من الهم على القلب.

طيب بلاش الجواز قطع و قطعت سيرته اللي تجيبلك كلكيعة في دماغك .. ممكن تصاحب عادي جداً .. حقك الشخصي .. بس عشان تصاحب بقى حتقابلك مشكلة لو انت بني آدم بيفكر ، انت عايز تعرف بنت بتفكر برضو .. عايز واحدة تقدر تتكلم معاها عادي منغير ما تبقى العلاقة بينكم تسبيل و هيام و حب ملتهب و بس .. أصل انت لو بتفكر أكيد لاحظت أن الدنيا واسعة جداً و فيها حاجات كتير بتحصل و دوشة و زحمة و بلاوي سودة ممكن تهمك حاجة فيها و يهمك في لحظة انك و انت قاعد مع البت بتاعتك تتكلم فيها .. بس للأسف انتوا الاتنين بتحصروا العلاقة في الرومانسية و(بسم الحب الجميل ، بسم العمر اللي بينا) عشان اتعودتوا على كدة .. المجتمع رباكوا على إن لو راجل و ست قاعدين مع بعض قدامهم حاجة من الاتنين : يا إما الشيطان تالتهم يا إما يتكلموا عن بعض و بس، و برضو الشيطان تالتهم !

بفرض انك انسان حقيقي جداً و مثقف و قابلت بنت مثقفة و بتفهم و حقيقية جداً ـ بغض النظر عن شكلها لأنها لو بتفهم أكيد مش حلوة ـ و قعدتوا مع بعض ، لا انت حتعرف انها بنت كويسة ولا هي حتعرف انك بني آدم .. لأن كل واحد منكم حيفضل يتعامل مع التاني على أساس : دي الكائن الخرافي اللي اسمة الأنثى .. لازم أبان شكلي حلو و سكسي و عميق و دمي خفيف ليه مش عارف !! و هي حتتعامل معاك من منطلق: هو ده الذكر المصري الفحل اللي يبان طيب لكن ساعة الغلط بيطرطش زلط .. بصاته ليا غريبة قوي .. أكيد هرموناته اشتغلت .. يللا بقى .. شوية لعب كدة .. بس إيه لزومه .. مش عارفة !!
غصب عنكم و لا إرادياً و منغير ما تحسوا حتتعاملوا كدة .. الله الأنثى أهيه .. الله الذكر اهه.

أفتكر ان العلاقة بين الراجل و الست في مصر اقتصرت على ان كل طرف فيهم بيفكر في الطرف الآخر و بس .. قصدي أنه مضيع وقته في مجرد التفكير في كنه و كينونة الطرف الآخر لكن قليلين جداً اللي خدوا بالهم ان الطرفين بني آدمين مش كائنات فضائية نازلة من السما علشان تطرح التساؤلات في الأدمغة.. و ان الواحد ممكن يتعامل مع الطرف الآخر على أنه إنسان مش مجرد ( آخر) .. أو هدف شبه مستحيل.

و لأني مش عارف أرتب أفكاري و اقطع دراعي ان كان حد فهم حاجة من اللي انا كاتبه ـ و مش مهم ـ فمضطر أختم الكلام بقى و ليا مزاج أقول شوية حكم فرعونية حديثة عن الراجل و الست في مصر .. أقوال ماثورة يمكن توضح الطرفين بيفكروا في بعض ازاي و التفكير اقتصر على إيه:

- لكيد الغيورين: " العروسة للعريس و الجري للمتاعيس"
- يقول الغيورون: " ربنا يهني سعيد بسعيدة"
- للمتعاليات بدون داعي: " عينها فيه و تقول إخيي"
- نصيحة للشاب التعبان :" عَشَرة باليد ولا الحوجة لحد"
- مازلت مش فاهم المقصود من هذا المقطع: " ما اعرفش أدق الكزبرة علشان أنا لسة صغيرة" !!!!!!!!!!!!
- حكمة عميقة :" إعرف راجل تعيش راجل تموت راجل .. إعرف ست تخسر كل يوم راجل"
- تحذير لم تستفد منه أنثى :" قال يا مآمنة للرجال يا مآمنة للمية في الغربال" بغض النظر عن أنه :"ضل راجل ولا ضل حيطة"
- و ختاماً :"سايبني لمين من بعدك يا ساااااااااااابعي "